Është mbajtur seanca gjyqësore në Gjykatën Themelore të Prishtinës, dega në Lipjan ndaj pesë zyrtarëve policorë që janë të përfshirë në vdekjen e 27-vjeçarit, Agon Zejnullahu.
Pesë policët po dyshohen se kanë kryer veprën penale “vrasje nga pakujdesia”.
Ekipi i Tëvë1 nga atje ka bërë të ditur se seanca gjyqësore ka përfunduar.
E për këtë, avokati i njërit prej policëve, Besnik Berisha ka deklaruar se zyrtarët policorë nuk janë fajtorë për vdekjen e 27-vjeçarit, derisa ai shtoi se nuk duhet të përbaldozet e as të sulmohet policia.
Ai tutje ka thënë se nuk duhet të nxitoj askush të gjykojë policët, derisa të zbardhen detajet e tjera nga mjekësia për vdekjen e të ndjerit.
Tutje, avokati ka thënë se ka dyshime që veprimet e të ndjerit kanë ardhur si pasojë e ndikimit nga substancat e marra.
“Për një rast që unë besoj fuqishëm që as nuk e kanë shkaktuar zyrtarët policor, policia sot po sulmohet padrejtësisht përderisa mjekësia nuk ka folur më tutje dhe nuk dihet as shkaku i vdekjes e as kontributin e shkakut të vdekjes e aq më pak nuk dihet se kush ishin substancat të cilat ishin në organizmin e tani të ndjerit. Por zyrtarët policor nuk janë as fajtorë. Aty nuk prodhohen medikamente që i ka protokolli i mjekësisë, prandaj nxitoi ajo zonja që t’i fajësoi policinë para se të flasë mjekësia. Veprimet të cilat dyshohen se janë shkaktuar nga substancat për të cilat duhen që dikush të flas dhe nuk jemi ne si avokat as policia, e as analistët. Nuk është kjo drejtësi, nuk duhet të përbaldozet kjo polici nuk e meriton të sulmohet edhe nëse kanë gabuar 1,2,3 ose 5 veta”, ka deklaruar Berisha.
Ndryshe, Policia e Kosovës për këtë rast ka thënë se i ndjeri, Agon Zejnullahu, dyshohet se në mbrëmjen e 7 korrikut ka qenë nën ndikimin e alkoolit dhe i tillë ka sulmuar automjete e kalimtarë, derisa është ndaluar nga autoritetet e rendit.
Nga pamjet e publikuara në media, 27-vjeçari duket me duar të lidhura dhe në gjunjë, ndërsa më pas bartet me auto-ambulancë.
Familja ka deklaruar se është e zhgënjyer me mungesën e deritashme të transparencës nga autoritetet e vendit./teve1.info/
