Deputeti nga radhët e Partisë Demokratike të Kosovës (PDK), Hajdar Beqa ka thënë se mosfunksionimi i Bordit Shqyrtues të Prokurimit Publik (OSHP) po i konvenon pozitës dhe se kishte dëgjuar zëra se kandidatët e propozuar nuk ishin të duhur për deputetët e shumicës parlamentare dhe se kandidatët as nuk i kanë njohur.
‘Konsideroj që mazhoranca, përveç që ka pasur interes, individë nga mazhoranca duan që mos të funksionalizohet kjo gjykatë përkatëse, në këtë rast të tenderëve në Republikën e Kosovës. Arsyeja është sepse kandidatët të cilët u propozuan për t’u votuar në Kuvendin e Republikës së Kosovës nuk ishin të duhur për mazhorancën. Edhe kam dëgjuar zëra që nuk po i njohim. Por nuk është me rëndësi a po i njeh Parlamenti, a po i njohim ne deputetët kandidatët, sepse është komisioni përkatës i cili në bazë të CV-ve edhe përgjigjeve që i bëjnë ata në intervista, të na i propozojë votimet”, ka thënë Beqa në emisionin “De Jure”, i cili po transmetohet në “Tëvë1” dhe “Betimi për Drejtësi”.
Ai ka shtuar se konkursi i ka respektuar rregullat deri në votim, por pastaj vetë Lëvizja Vetëvendosje, e cila ka pushtetin, nuk i ka votuar këta kandidatë për bord të OSHP-së.
Për më shumë ndiqeni hulumtimin “Lufta politike” për gjykatën e tenderëve, i cili po transmetohet në “Tëvë1” dhe “Betimi për Drejtësi”./Tëvë1/
