Nga prilli i vitit 2027 në Kosovë pritet të vijnë mbi 300 të burgosur nga Danimarka.
Kjo pas marrëveshjes së nënshkruar ndërmjet dy vendeve, ku shteti do të përfitojë mbi 200 milionë euro.
E një synim të tillë e ka edhe Belgjika, e cila ka shprehur dëshirë që disa të burgosur ti sjellë në Kosovë.
Shërbimi Korrektues i Kosovës, ka bërë me dije që disa shtete disa shtete të tjera, përfshirë edhe Belgjikën, kanë shprehur në forma të ndryshme interesim për marrjen në shfrytëzim të institucioneve korrektuese të Kosovës.
“Pas ratifikimit të Traktatit ndërmjet Republikës së Kosovës dhe Mbretërisë së Danimarkës për dhënien në shfrytëzim të Burgut të Gjilanit për ekzekutimin e dënimeve daneze, disa shtete të tjera, përfshirë edhe Belgjikën, kanë shprehur në forma të ndryshme interesim për marrjen në shfrytëzim të institucioneve korrektuese të Republikës së Kosovës. Shërbimi Korrektues i Kosovës nuk ka pranuar ndonjë shkresë zyrtare lidhur me këtë çështje. Po ashtu, Shërbimi Korrektues i Kosovës nuk ka kompetencë për trajtimin e kërkesave në nivel ndërkombëtar që lidhen me dhënien në shfrytëzim të institucioneve korrektuese”, thuhet nga ShKK.
Por ardhjen e të burgosurve belgë në Kosovë, nuk po e sheh si fortë të udhës Këshilli për Mbrojtjen e të Drejtave dhe Lirive të Njeriut.
“Faktikisht është bërë gabimi kur është bërë marrëveshja me Danimarkën, pra është hapur rruga që kushdo që jep pak para mundet të sjelle kriminelë nga e gjithë bota në Kosovë. Ata nuk janë shtetas as të Belgjikës as të Danimarkës, ata janë shtetas të vendeve të treta të cilët kanë bërë problem. Të gjithë nuk kanë mundur të rehatojë as Danimarka e as Belgjika me një kapacitetet shumë më të madh edhe profesional edhe material e tash po bien hise Kosovës që nuk po mund të merret me burgosurit e vet”, ka thënë Behxhet Shala.
Madje sipas KMDLNJ –së, sjellja e këtyre personave në Kosovë është në kundërshtim me liritë dhe të drejtat e njeriut.
“Kjo është në kundërshtim me të drejtat e njeriut pas ata njerëz këtu do të sillen ne mënyrë të dhunshme përkundër vullnetit të tyre dhe do të shkelen të drejtat e njeriut dhe fakti që Kosova nuk është anëtare e Këshillit të Evropës ua mundëson këtë aventura patologjike. Kjo nuk ka logjikë, ata njerëz kanë familje duhet të kenë vizita duhet të kenë shërbime mjekësore”, është shprehur ai.
Edhe nga Qendra për Ndihmë Juridike dhe Zhvillim Rajonal nuk e shohin se të arsyeshme që të burgosurit e vendeve tjera të vijnë në Kosovë.
“Kjo është një politikë e gabuar pasi Kosova nuk mund të shndërrohet në një burg evropian kjo është e para dhe e dyta për të ndodhur kjo duhet të ketë marrëveshje në mes të dy qeverive, pra marrëveshje ndërmjet Qeverisë së Kosovës dhe e njëjta marrëveshje të kalohet në Kuvend”, ka thënë Anton Recaj.
Së fundmi, në Kosovë kanë qëndruar edhe Ministrja belge e Drejtësisë, Annelies Verlinden, së bashku me ministren e Azilit dhe Migracionit, Anneleen Van Bossuyt, ku zyrarisht u tha seu diskuta për bashkëpunime në fushën e drejtësisë.
