Më 18 gusht do të botohet libri me 256 faqe “Ylli i Futbollit”, me autor Andreas Boni.
Në librin “Ylli i Futbollit”, shumë njerëz nga bota e futbollit hapen dhe flasin hapur për përjetimet në jetën e tyre.
Gazeta e madhe zvicerane “Blick” i ka publikuar deklaratat më të fuqishme dhe rrëqethëse të disa personaliteteve.
Njëri prej tyre që është përfshirë në librin e autorit Boni, është ish-mesfushori i Zvicrës, Valon Behrami.
Boni, 43-vjeçar, me origjinë nga Zvicra Lindore, punoi në Blick për 15 vjet. Që nga viti 2023, ka qenë kryeredaktor i “Blue Sport”.
Behrami ka folur për përvojën e tij të largimit nga Kosova më 1990 dhe për atë se si futbolli i ndihmoi atij të rehatohej në Zvicër.
“Mbërritëm në Zvicër me autobusin e fundit nga Kosova kur kuptuam se nuk kishte të ardhme. Pak më vonë, filloi gjithçka. Shtëpia jonë u dogj, humbëm miq dhe të afërm, një xhaxha ishte në burg. Secili prej nesh e ka historinë e vet. Halla ime dhe një xhaxha tjetër u fshehën dhe më pas u gjetën. Ja çfarë ndodhi. Të gjitha gratë u rreshtuan në njërën anë, ndërsa burrat në anën tjetër. Dhe pastaj halla ime duhej të shikonte ndërsa burri i saj dhe të gjithë të tjerët u qëlluan. Ishte çmenduri. Pjesa më e keqe ishte pasiguria, sepse dinim shumë pak. Dhe pastaj dëgjoje në TV se kishin vdekur edhe 20 persona të tjerë. Dhe nuk e dije nëse gjyshërit e tu kishin vdekur. Nuk i kuptoja ende të gjitha, por ishte jashtëzakonisht e tmerrshme për prindërit e mi”, ka thënë Behrami.
Behrami i ka regjistruar 83 paraqitje me Kombëtaren e Zvicrës, ndërsa aktualisht mbanë postin e drejtorit sportiv të Watfordi.
Behami ka bërë karrierë të madhe si lojtar, ku ka luajtur për skuadra, si Lugano, Genoa, Verona, Lazio, West Ham United, Fiorentina, Napoli, Hamburg, Watford, Udinese, Sion, Genoa e Brescia.
I ka luajtur 259 ndeshje në Serie A, 106 në Premier Leauge, 22 në Bundesliga dhe dhjetë në Ligën e Kampionëve.
Me Napolin e fitoi Kupën e Italisë në vitin 2014, ndërsa është lojtari i vetëm i Zvicrës që është paraqitur në katër botërorë rresht.
