Njëri nga futbollistët më të mirë të vendit, dhe emblematik të ligës elite, Behar Maliqi, ka vendosur të tërhiqet nga futbolli aktiv.
Ish-futbollisti i Prishtinës e shumë skuadrave të tjera nga vendi dhe nga Shqipëria dhe dikur përfaqësues i Kombëtares, po largohet nga fusha e blertë pas më shumë se 20 vitesh karrierë.
Përmes një njoftimi në rrjetet sociale, Maliqi dha lajmin e tërheqjes, duke falënderuar të gjithë ata që e ndihmuan dhe e përkrahën atë gjatë karrierës së bujshme me shumë trofe e çmime individual.
Behar Maliqi pritet që t’i përvishet zanatit të trajnerit, pasi është duke u licencuar për këtë profesion.
Mëposhtë po e sjellim të plotë shkrimin emocional të Maliqit:
Të dashur familjarë dhe miq,
Sot dua t’ju informoj për një vendim shumë të rëndësishëm. Pas një karriere të gjatë prej më shumë se 20 vitesh në futboll, kam vendosur të tërhiqem nga futbolli aktiv.
Gjatë kësaj periudhe si lojtar aktiv, kam fituar shumë. Kam përjetuar momente të paharrueshme, kam krijuar miqësi të shumta dhe kujtime që do t’i mbaj mend gjithmonë. Veshja e fanellës së përfaqësueses së Kosovës, ishte një ndër arritjet më të mëdha, ishte nder dhe privilegj që të përfaqësoje vendin tim.
Dua të falënderoj në radhë të parë familjen time dhe shoqërinë për mbështetjen gjatë gjithë karrierës sime. Po ashtu dua të falënderoj të gjithë ata që kanë qenë pjesë e karrierës sime: të gjithë klubet që më kanë besuar fanellën e tyre (KF Feronikeli 74, KF Prishtina, KF Llapi, KF Malisheva, FK Partizani, KF Fushe Kosova, KF Keku, KF Airoporti), të gjithë trajnerët, të gjithë bashkëlojtarët dhe patjetër edhe gjithë tifozët për përkrahjen.
Faleminderit edhe njëherë për të gjitha emocionet.
Behar Maliqi
