Në një përgjigje për Teve1.info, zëdhënësja e LDK-së, Sibel Halimi tha se kjo parti ka shprehur keqardhje për mosrealizimin e takimit zyrtar me Begajn, me rastin e vizitës së tij të parë në Kosovë.
“Lidhja Demokratike e Kosovës shprehë keqardhje për mosrealizimin e takimit zyrtar me Presidentin e ri të Shqipërisë, shkëlqesinë e tij Bajram Begaj; me rastin e vizitës së tij të parë në Kosovë. Për dallim nga krerët institucional paraprak të Shqipërisë, Presidentët e shkuar, Kryeministrin e tanishëm, e të tjerë kryeministra paraprak, Presidenti Begaj ka refuzuar të takojë LDK-në në selinë qendrore të saj”, tha ajo.
Halimi u shpreh se nuk e kuptojnë refuzimin e takimit të Begajt me LDK-në, teksa thotë se e konsiderojnë si mundësi të humbur takimin e presidentit të ri shqiptar.
Sipas saj, LDK-ja ka selinë e vet dhe ajo mbetet e hapur për çdo zyrtar të shtetit shqiptar.
“Ndonëse nuk e kuptojmë refuzimin e tillë dhe shprehim njëkohësisht habinë për një qasje të pazakontë, konsiderojmë si mundësi të humbur takimin me Presidentin Begaj; të cilit i urojmë suksese në përfaqësimin më dinjitoz të Republikës së Shqipërisë. LDK ka selinë e vet dhe ajo mbetet e hapur për çdo zyrtar të shtetit shqiptar – siç ka qenë përherë”, ka deklaruar Halimi për Teve1.info
Presidenti i ri i Shqipërisë, Bajram Begaj i cili e nisi vizitën e tij të parë në Kosovë si president i Shqipërisë, të hënën u prit nga presidentja e Kosovës, Vjosa Osmani, kryeparlamentari Glauk Konjufca dhe kryeministri Albin Kurti.
Ndërkaq, sot Begaj mëngjesin e ka nisur me kryetarin e PDK-së, Memli Krasniqi, më pas u takua edhe me kreun e AAK-së, Ramush Haradinaj si dhe Erxhan Galushin nga Partia e Romëve. /teve1.info/
