Presidenti i Shqipërisë, Bajram Begaj, i ka kërkuar homologes së tij në Moldavi, Maia Sandu, që shteti që ajo drejton të rishqyrtojë njohjen e shtetit të Kosovës.
Këtë kërkesë Begaj ia bëri gjatë vizitës zyrtare që po zhvillon në Moldavi.
“Së bashku, si partnerë dhe si miq, punojmë për një Evropë më të fortë dhe më të sigurt, si dhe inkurajojmë rishqyrtimin e njohjes së Kosovës”, ka shkruar Begaj pas takimit me Sandu.
Kreu i shtetit shqiptar theksoi se bisedimet me presidenten e Moldavisë ishin frytdhënëse dhe se besimi i ndërsjellë, dialogu i qëndrueshëm politik dhe bashkëpunimi konstruktiv, në shërbim të interesit të përbashkët dhe qytetarëve, janë në themel të marrëdhënieve mes dy vendeve.
“Në mjedisin sfidues të sigurisë së sotme, zgjerimi i Bashkimit Evropian mbetet faktor kyç për stabilitetin dhe paqen. Ne mbështesim plotësisht rrugën evropiane të Moldavisë”, ka shtuar Begaj.
