Kryetari i Komunës së Mitrovicës, Bedri Hamza ka bërë homazhe në nderim të martirëve para pllakës përkujtimore në Mitrovicë.
Në njoftim thuhet se kryetari Hamza, tha se muaji prill është muaj i dhimbjes dhe pikëllimit për gjithë familjarët e martirëve të cilët u vranë 23 vite më parë në shtëpinë muze në Lagjen e Boshnjakëve.
“23 vite më parë në këtë shtëpi u vranë e u torturuan bashkëqytetarët tanë të cilët përjetuan dhunën dhe tmerrin, mirëpo sot ne gëzojmë lirinë dhe shtetësinë tonë, falë luftës së lavdishme të UÇK-së, të NATO-s dhe aleatëve tjerë. Me respektin më të madh përulemi para të gjithë atyre që sakrifikuan për lirinë e vendit tonë. Lavdi dëshmorëve dhe të gjithë martirëve të luftës”, tha Hamza.
Pas kësaj ceremonie janë bërë homazhe dhe janë vendosur kurora me lule edhe në varrezat e martirëve të kombit në Shipol.
