Shefja e Bashkimit Evropian Ursula von der Leyen u zotua të martën se tarifat e SHBA-së për çelikun dhe aluminin “nuk do të mbeten pa përgjigje”, duke shtuar se ato do të nxisin kundërmasa të ashpra nga blloku 27-vendesh.
“BE do të veprojë për të mbrojtur interesat e saj ekonomike”, tha von der Leyen në një deklaratë si reagim ndaj vendosjes së tarifave të presidentit amerikan Donald Trump për çelikun dhe aluminin një ditë më parë, raporton AP.
“Tarifat janë taksa – të këqija për biznesin, edhe më të këqija për konsumatorët”, tha von der Leyen. “Tarifat e pajustifikuara ndaj BE-së nuk do të mbeten pa përgjigje – ato do të shkaktojnë kundërmasa të forta dhe proporcionale.”
Në Gjermani, shtëpia e ekonomisë më të madhe të BE-së, kancelari Olaf Scholz i tha parlamentit se “nëse ShBA nuk na lë zgjidhje tjetër, atëherë Bashkimi Evropian do të reagojë i bashkuar”, duke shtuar se “në fund të fundit, luftërat tregtare gjithmonë i kushtojnë të dyja palëve në prosperitet”.
Trump po godet çelikun dhe aluminin e huaj me një taksë 25% me shpresën se ato do t’u japin prodhuesve vendas lehtësim nga konkurrenca intensive globale, duke ua mundësuar atyre të mbajnë çmime më të larta.
Pasi Trump vendosi tarifa për çelikun në 2018, BE-ja vendosi kundër-tarifa për motoçikletat e prodhuara në SHBA, burbonin, gjalpin e kikirikut dhe xhinset, ndër të tjera.
