Komisioni evropian ka përcaktuar shtatë “vende të sigurta të origjinës”, ku pastaj kërkesat për azil mund të përcillen me shpejtësi dhe potencialisht të refuzohen.
Në këtë listë bëjnë pjesë Kosova, Egjipti, Tunizia, Maroku, India, Kolumbia dhe Bangladeshi.
Azilkërkuesit që mbërrijnë në BE nga këto vende mund t’i shohin kërkesat e tyre të refuzuara dhe potencialisht mund t’u jepet një urdhër kthimi sipas rregullave të reja të BE-së.
Kjo lëvizje pritet të pasohet nga një rishikim i shpejtë i konceptit të vendit të tretë të sigurt në ligjin e BE-së.
Koncepti i vendit të tretë të sigurt lejon që azilkërkuesit të dërgohen në një vend ku ata mund të gjejnë mbrojtje, në vend që të qëndrojnë në vendin ku kanë aplikuar, ka raportuar Euractiv.
Lista do të përfshihet si një ndryshim në rregulloren e procedurës së azilit të BE-së, pjesë e paktit të migracionit të miratuar vitin e kaluar, e që është vendosur të zbatohet në vitin 2026.
Në mars, Komisioni propozoi rregulla të reja detyruese për kthimin e emigrantëve, për të cilat vendet e BE-së dhe eurodeputetët po debatojnë tani.
