Zëdhënësi i Bashkimit Evropian, Peter Stano, nuk ka dhënë detaje të reja sa i përket letrës së tërhequr nga Serbia, e cila thuhej se nuk i respektonte obligimet nga Marrëveshja e Ohrit.
Përmes një konference për media Stano ka ripërsëritur deklaratën e emisarit Miroslav Lajçak dhe duke shtuar se palës serbe i takon të japë më shumë detaje.
Ndërkohë, ai nuk dha detaje se kur është tërhequr letra dhe se si është bërë një gjë e tillë.
“Sërish, në emër të BE-së mund të them atë që emisari evropian e tha në Prishtinë javën e kaluar, s’ka nevojë ta përsërisim atë. Pse, kur, si, nëse bëri diçka apo s’e bëri, kjo u përket autoriteteve të Serbisë që ta adresojnë pyetjen. Por mund të them pozicionin e BE-së nga dita e parë e marrëveshjes së Ohrit, është ligjërisht e obligueshme dhe dy palët e kanë detyrë ta implementojmë”, tha ai. /teve1.info/
