Janë bërë mbi 1 vit e gjysmë që nga sulmi terrorist në Banjskë të Zveçanit.
Por grupi terrorist në krye me kryeterroristin Millan Radojiçiq vazhdojnë të jenë të lirë.
E nën drejtimin e shefes së lartë për Politikë të Jashtme dhe Siguri në Bashkimin Evropian, Kaja Kallas, BE-ja bën thirrje urgjente që autorët e sulmit të 24 shtatorit në Banjskë të dalin para drejtësisë.
Kështu thuhet në përgjigje për Tëvë1 nga BE-ja.
“Marrim parasysh njoftimin e Prokurorisë së Lartë Publike në Beograd më 2 dhjetor 2024 për hapjen e një hetimi për këtë rast. Ne presim që Serbia, në përputhje me angazhimet e bëra në mënyrë të përsëritur ndaj BE-së, të ndërmarrë urgjentisht të gjitha hapat e nevojshëm për të ndjekur penalisht dhe sjellë në gjykatë autorët e dyshuar të gjetur në Serbi dhe për të siguruar bashkëpunim të plotë për hetimin e këtyre sulmeve. Presim që të gjithë autorët e sulmit të 24 shtatorit 2023 të dalin përpara drejtësisë sa më shpejt”, thuhet nga BE për Tëvë1
Por pritshmëritë që ky grup të del para drejtësisë janë të vogla.
Pasi që ish-deputeti i partisë së Aleksandër Vuciq, Dragan Sormaz thotë se Vuçiq nuk ka guxim të kërkoj arrestimin e tyre.
“ Vuçiqi nuk guxon të padit Radojçiçin. Ani pse i ka premtuar Perëndimit se do ta padit në Serbi. Radojçiç nuk do të paditet në Serbi, dhe këtë e ka paralajmëruar prokuroria duke thënë se nuk ekzistojnë dëshmi që Radojçiç të paditet, sepse paramendojeni të gjykohet Radojçiç, qoftë në Prishtinë, qoftë në Beograd. Po filloi të flasë ai, Vuçiçi vetë duhet të paketohet dhe të shkojë në burg. Nuk i duhet dikush tjetër. Kështu që Radojçiçi do të jetë i lirë deri sa nuk ndien ndonjë presion”, thotë ai.
Sormaz për Tëvë1 thotë se i ka kërkuar Millan Radojçiqit dorëzimin në Kosovë.
“ Edhe unë, qysh pas Banjskës, i kam sugjeruar Radojçiçit që më së miri e ka të shkojë në Prishtinë. Atje të provojë të bëjë marrëveshje sepse këtu herëdokurdo situata për të do të bëhet e pasigurt” , thotë Sormaz.
Më 24-shtator 2023, Millan Radojiçiq me grupin e tij hynë përmes rrugëve ilegale në Banjskë të Zveçanit ku sulmuan Policinë e Kosovës, për pasojë mbeti i vrarë rreshteri, Afrim Bunjaku.
