Përdorimin e kodit të strukturave paralele “38220” e arsyetuan me gabim teknik.
Mirëpo, kompania serbe e energjisë Elektrosever këtë gabim e bëri prapë.
Edhe në faturën e qershorit të energjisë elektrike për katër komunat veriore po figuron kodi postar dhe termi jo-kushtetues “Kosovska Mitrovica”.
Pavarësisht që kanë kaluar shtatë muaj prej kur ka filluar shpërndarja e faturave të rrymës, nga Bashkimi Evropian po thonë se duhet periudhë e tranzicionit.
“Që nga fillimi i janarit 2024, Elektrosever filloi të operojë, duke përfshirë nënshkrimin e kontratave me klientët dhe lëshimin e faturave. Ky është një hap shumë i rëndësishëm në drejtimin e duhur për të zbatuar plotësisht Udhërrëfyesin e Energjisë 2022. Megjithatë, kërkohet një periudhë tranzicioni përpara se kompania të jetë plotësisht funksionale dhe të aftë për të kryer plotësisht detyrat e saj, ndër të tjera për aktivitetet e nevojshme informuese për të siguruar regjistrimin e të gjithë konsumatorëve të energjisë elektrike dhe për përmirësimin e infrastrukturës. BE-ja po monitoron nga afër zbatimin e Marrëveshjeve për Energjinë dhe Udhërrëfyesin e Energjisë dhe vlerëson progresin në vazhdimësi. Çështjet që kanë të bëjnë me zbatimin diskutohen rregullisht me palët dhe aktorët e tjerë përkatës”, tha zëdhënësi i Bashkimit Evropian, Peter Stano.
E nga ekzekutivi ripërsëriten se në takimin e fundit të kryenegociatorëve, pala kosovare ka evidentuar këto shkelje nga Elektroseveri dhe të njëjtat i ka adresuar.
“E tëra kjo edhe pse elektroseveri është zotuar se gjithçka do të veprojë në kuadër të kornizës legjislative të Kosovës. Elektrosever duhet t’i përmbahet marrëveshjes dhe zotimeve dhe të funksionojë sipas rregullave dhe ligjeve të Republikës së Kosovës e t’i respektojë të njëjtat”, tha këshilltari i zëvendëskryeministrit Bislimi, Klisman Kadriu.
Televizioni tash e disa ditë ka kërkuar një qëndrim edhe nga kompania serbe e energjisë me bazë në Mitrovicën e Veriut, mirëpo të njëjtit kanë qenë të paqasshëm për të dhënë detaje.