Takimi dyditor i liderëve evropianë në kudër të Samitit të Këshillit Evropian ka nxjerr një varg konkluzionesh, ku në mesin e tyre kanë zënë vend edhe raportet mes Kosovës dhe Serbisë.
Në dokumentin e publikuar nga BE-ja bëhet e ditur se vendet anëtare dënojnë sulmin terrorist të 24 shtatorit dhe kërkojnë nga palët uljen e tensioneve.
Konkluzionet e Këshillit Evropian:
“Këshilli Evropian është thellësisht i shqetësuar për situatën e sigurisë në veri të Kosovës. Fuqishëm dënon sulmet e dhunshme ndaj Policisë së Kosovës më 24 shtator të vitit 2023. Bashkimi Evropian pret që kryesit të kapen dhe nxirren shpejt para drejtësisë dhe që Serbia të bashkëpunojë plotësisht dhe të ndërmarrë të gjithë hapat e domosdoshëm. Kosova dhe Serbia duhet të bëjnë përpjekje të qëndrueshëm për deeskalim, në veçanti zhvillimin e zgjedhjeve në veri të Kosovës sa më parë që të jetë e mundshme, me pjesëmarrjen aktive të serbëve të Kosovës. Dështimi në deeskalim do të ketë pasoja”.
Presidenti i Këshillit Evropian, Charles Michel, në një konferencë për media ka folur për atë se çfarë liderët kanë kërkuar të enjten nga kryeministri i Kosovës Albin Kurti dhe presidenti serb Aleksandar Vuçiq.
“Patëm një mesazh për të dy liderët se çfarë presim nga ta dhe çka ajo presim është që të implemetojnë marrëveshjet. Asociacioni është një element i rëndësishëm, jo i vetmi, por është i rëndësishëm që të implementohet, pika e parë. Elementi më i rëndësishëm, dhe kjo u bë e qartë nga liderë të ndryshëm sot në takimin e Këshillit Evropian, është fakti se të dy liderët në praninë e përfaqësuesve evropianë, bënë shumë të qartë qëllimin e tyre për të implementuar këto marrëveshje”.
Pozitive rezultatet e takimeve të djeshme i ka cilësuar edhe kancelari gjerman Olaf Scholz. Ai tha se Kurti e Vuçiqi janë zotuar se do të zbatojnë marrëveshjet.
“Tash kemi deklarime nga Kurti dhe nga Vuçiqi se ata do të ndërmarrin vendime të cilat janë pjesë e dokumenteve të ndryshme në të cilat kemi punuar, Marrëveshjen bazike, atë të Ohrit dhe tash konceptin dhe draftin konkret për Asociacionin e Komunave me shumicë Serbe në Kosovë. Kjo është thënë qartë dhe kjo është me rëndësi. Tash do të shohim se si kjo do të zbatohet”.
Edhe presidenti francez Emmanuel Macron tha se nga Albin Kurti e Aleksandar Vuçiq kanë kërkuar zbatimin e marrëveshjes së Brukselit dhe aneksit të Ohrit.
Ndërsa, Shefi i Politikës së Jashtme të Bashkimit Evropian, Josep Borrell mbrëmë ka deklaruar se nuk është arritur pajtim për zbatimin e marrëveshjeve për shkak se, siç tha ai, parakushteve që palët kanë vendosur.
