Ndryshimi i qasjes së BE-së ndaj Serbisë nuk është i vetmi, pasi siç raportojnë mediet ndërkombëtare, Parlamenti do të diskutojë edhe për mundësinë që hapja e kapitujve për anëtarësim drejtë Bashkimit Evropian të ndodhë me shumicë të kualifikuar në Këshill, duke i thënë fund unanimitetit që është përdorur deri sot.
Politologu, Dorajet Imeri thotë se për shkak të historisë së zhvillimit të BE-së është e vështirë që të arrihet realizimi i këtij propozimi.
“Ai thotë që kapitujt duhet të hapen dhe mbyllen varësisht nga arritjet e vendit kandidat, pa pasur nevojën për të pasur të gjitha votat e të gjitha vendeve të Bashkimit Evropian. Ndërsa sa i përket anëtarësimit ai nuk e paraqet këtë qëndrim, duke qenë se sigurisht anëtarësimi është një proces më kompleks ndërsa plotësimi i kritereve për anëtarësim. Prandaj në këtë aspekt unë konsideroj që do të jetë vështirë i arritshëm ky qëndrim, për shkak se Bashkimi Evropian ka një strukturë interesante të vendimmarrjes, ka një historik të veçantë të formësimit të saj dhe në këtë fazë në të cilën gjendemi konsideroj që mund të jetë e nevojshme por vështirë e realizueshme një ndryshim i tillë i vendimmarrjes përbrenda BE-së”, tha Imeri.
Ndërsa njohësi i çështjeve politike nga Shqipëria, Bledian Koka, thotë se kjo nismë mund të fillojë si një lloj testi.
“Kjo mund të jetë një test i parë, por që jam i sigurt që është një test që do të tregoi se pse veto nuk do të duhej të hiqej, ose vendimi unanim nuk do të duhej të hiqej në Bashkimin Evropian, sepse jam i sigurt që për shembull kur flasim për kapitujt vendi që është më i interesuar në këtë moment që të mos ketë votë unanime por të ketë votë shumice është Serbia, sepse pikërisht ajo është në fazën e negocimit të kapitujve me Bashkimin Evropian. Dhe nëse Serbisë i hapet rruga dhe i miratohen kapitujt, ndërkohë që ajo vazhdon të mbaj qëndrimet që ka në raport me Kosovën, madje edhe me Rusinë, mendoj që kjo do të ishte një thikë me dy presa”, tha Koka.
Nënshkrimi i marrëveshjes mes ministrave të jashtëm të Rusisë dhe Serbisë, bëri që përfaqësuesit e Bashkimit Evropian të reagojnë dhe të kërkojnë qartësi nga Serbia.
