Në deklaratë BE-ja u ka bërë thirrje serbeve që të kthehen në institucionet e Kosovës, sepse sipas tyre nuk është zgjidhje e mosmarrëveshjeve aktuale, raporton teve1.info
“Ne i bëjmë thirrje Serbisë dhe përfaqësuesve të serbëve të Kosovës që të respektojnë obligimet e tyre të Dialogut dhe të kthehen në institucionet e Kosovës për të përmbushur detyrat e tyre, duke përfshirë policinë, gjyqësorin dhe administratat lokale.Në të njëjtën kohë, BE-ja përsëri u kërkon autoriteteve të Kosovës që të respektojnë detyrimet e tyre pa vonesë. Kjo nënkupton zgjatjen e menjëhershme të procesit të riregjistrimit të automjeteve dhe pezullimin e çdo veprimi ndëshkues ndaj mbajtësve të targave KM. Çështja e targave mund të zgjidhet nga Palët në kuadër të Dialogut”, thuhet në deklaratë.
BE-ja po ashtu i ka bërë thirrje Kosovës të fillojë hapat për themelimin e Asociacionit të Komunave me Shumicë Serbe.
BE-ja ka theksuar se themelimi i Asociacionit është obligim ligjor për Kosovën.
“BE-ja gjithashtu i bën thirrje Kosovës që të fillojë menjëherë hapat për themelimin e Asociacionit/Bashkësisë së Komunave me Shumicë Serbe. Kuvendi i Kosovës ka ratifikuar Marrëveshjen e Brukselit dhe Gjykata Kushtetuese e Kosovës ka vendosur që Asociacioni/Bashkësia duhet të krijohet. Prandaj, themelimi i saj është obligim ligjor për Kosovën. Dështimi i vazhdueshëm i zbatimit të këtij obligimi cenon parimin e sundimit të ligjit dhe dëmton reputacionin dhe kredibilitetin e Kosovës”, thuhet tutje.
Kujtojmë që të shtunën përfaqësuesit serb kanë vendosur të largohen nga institucionet e Kosovës, çka ende nuk e kanë bërë zyrtarisht. Vendim i tyre ka ardhur pas suspendimit të drejtorit të Policisë së Kosovës për rajonin e veriut, Nenad Gjuriq, i cili ka refuzuar që të zbatojë vendimin e Qeverisë për riregjistrimin e makinave që kanë targa të lëshuara nga Serbia në RKS./teve1.info