Bashkimi Evropian ka dënuar fuqishëm situatën e krijuar ditën e sotme në veri të vendit, në të njëjtë kohë dhe sulmet ndaj patrullave të EULEX-it.
Zëdhënësi i BE-së, Peter Stano ka thënë se BE-ja nuk do pranojë asnjë veprim të mëtejshëm të njëanshëm dhe provokues, përcjell teve1.info
“BE dënon fuqishëm përleshjet në veri, dënon sulmet ndaj patrullave të EULEX-it. Të gjithë duhet të ndërmarrin veprime për të de-përshkallëzuar dhe rivendosur qetësinë. BE-ja nuk do të pranojë asnjë veprim të mëtejshëm të njëanshëm, provokues”, ka shkruar ai në Twitter.
Reagim për situatën në veri ka pasur edhe nga Shtetet e Bashkuara të Amerikës.
Ambasadori amerikan, Jeff Hovenier ka thënë se masat e sotme të dhunshme duhet të ndërpriten menjëherë. Ai po ashtu ka deklaruar se SHBA-ja dënon “veprimet e vazhdueshme të autoriteteve kosovare për të hyrë në ndërtesat komunale në veri të Kosovës”.
Në protestat e sotme në komunat veriore janë lënduar pesë pjesëtarë të Policisë së Kosovës, derisa janë dëmtuar 4 vetura.
Situata në veri është tensionuar që nga mesdita e sotme, si shenjë pakënaqësie nga serbët lokal pas betimit që kanë bërë dje kryetarët e komunave në Leposaviq, Zubin Potok, dhe Zveçan. /Teve1.info/
