Ambasadori i Bashkimit Evropian në Kosovë, Aivo Orav, ka reaguar pas kritikave të Qeverisë në detyrë për vendimin e Gjykatës Supreme që shfuqizoi Udhëzimin Administrativ për pajisjet fiskale dhe softuerët elektronikë fiskalë. Ai ka theksuar se ndërhyrjet politike në gjyqësor janë të papranueshme.
“Krerët e misioneve të BE-së diskutuan situatën pas vendimit të Gjykatës Supreme. Sulmet kundër gjyqtarëve individualë dhe ndërhyrja politike në gjyqësor janë të papranueshme”, ka shkruar Orav në platformat sociale, duke shpërndarë një reagim të mëhershëm të Supremes.
Reagim të ngjashëm ka dhënë edhe ambasadori gjerman në Kosovë, Jorn Rohde, i cili e cilësoi si të papranueshme çdo sulm ndaj gjyqtarëve dhe ndikim politik mbi drejtësinë.
“Mbështetje e plotë për qëndrimin e ambasadorit të BE-së! Sulme të tilla kundër gjyqtarëve individualë dhe ndërhyrja politike në gjyqësor janë absolutisht të papranueshme. Është më e pakta që i duhet këtij vendi në këtë situatë politike tashmë të vështirë”, ka shkruar Rohde.
Gjykata Supreme, në vendimin e saj të fundit, shfuqizoi një udhëzim administrativ të lëshuar nga ministri në detyrë i Financave, Hekuran Murati, duke konstatuar se një deputet i betuar nuk mund të ushtrojë paralelisht edhe funksionin e ministrit.
Qeveria në detyrë ka reaguar ashpër ndaj këtij vendimi, duke e cilësuar atë si “arbitrar dhe të njëanshëm”. Ndërkohë, Gjykata Supreme është përgjigjur duke thënë se deklaratat e qeverisë përbëjnë ndërhyrje në pavarësinë e sistemit gjyqësor dhe janë të papranueshme.
