Gjykata Speciale në Hagë ka kryer sot (e marte) bastisje në banesën e familjarëve të dëshmorëve Bahri e Fahri Fazliu.
E njëjta banesë pretendohet që në kohën e luftës shërbente si bazë e Ushtrisë Çlirimtare të Kosovës.
Bastisja përfundoi pas 5 orëve ku Zyra e Prokurorit të Specializuar mori disa dokumente.
E në kohërat më të vështira për vendin tonë, kjo banesë në Prishtinë pretendohet shërbeu si bazë e Ushtrisë Çlirimtare të Kosovës, deri në përfundimin e luftës.
Paraditën e të martës, e njëjta ishte cak i një bastisje nga Gjykata Speciale e Hagës.
Pas njoftimit të avokatit të familjes lidhur me rastin, këtu erdhi nipi i heronjve Fazliu, Fahri Fazliu, i cili në qershor të vitit 2021 kishte marrë ftesë nga Zyra e Prokurorit të Specializuar në kuadër të Gjykatës Speciale, edhe pse në kohën e luftës ishte vetëm tetëvjeçar.
“Nuk jam lejuar të hy brenda. Brenda gjendet Fadili, Bahria, Gzimi, Majlinda (motra) që është liruar se është në punë dhe të tjerët janë të mbyllur brenda në banesë. Telefonat i kanë të gjithë të mbyllur”, tha Fahri Fazliu, nipi i heronjve.
Të kota këto bastisje i quajti avokati i familjes Fazliu, Artan Qekini.
“Dhomat e Specializuara kanë kryer sot një bastisje në banesën e familjarëve të heronjve, Fahri e Bahri Fazliu në Kodrën e Diellit në Prishtinë. Janë munduar kinse të sekuestrojnë prova të cilat atyre ju nevojiten për procedura të mëtutjeshme, mirëpo unë jam shumë i bindur se ata nuk kanë sekuestruar asnjë provë të vetme dhe se ka qenë një bastisje e kotë dhe humbje kohë për të gjithë ata”, tha avokati i familjes, Artan Qekini.
Sipas Qerkinit, Gjykata duhet të jetë më e kujdesshme në lëshimin e urdhrave për bastisje, sepse, siç tha ai, është cenim i privatësisë.
“Konsideroj se Gjykata duhet të jetë më kujdesshme në lëshimin e urdhrave për bastisje, sepse cenohet privatësia, në anën tjetër siç ndodhi me rastin më konkret, nuk kanë sekuestruar asnjë provë me relevancë për procedurën penale dhe për procedurat të cilat janë në rrjedhë e sipër pranë Dhomave të Specializuara”, u shpreh Qerkini.
Bastisja përfundoi pas 5 orëve, ku edhe u sekuestruan dokumente e gjësende të tjera.
“Gjërat që nuk ishin në letër për t’u konfiskuar, ato u konfiskuan”, ka thënë ai, duke shtuar se nuk kanë dyshime se për çfarë është kryer kjo bastisje. Kjo banesë ka shërbyer si bazë e UÇK-së deri në përfundim të luftës, por edhe sot është banesë e shoqërisë e shokëve tanë. Nuk ka kryeministër që nuk ka qenë këtu”, deklaroi familjari i dëshmorëve, Fadil Fazliu.
Sa i përket sjelljes së pjesëtarëve të Dhomave të Specializuara dhe të Zyrës së Prokurorit të Specializuar të Kosovës në Hagë, Fazliu ka thënë se ishte shumë korrekte.
Autore: Lendrina Kodrolli
