KB Bashkimi ka reaguar ashpër që kapiteni Altin Morina nuk është përfshirë në listën e selektorit Jean-Denys Choulet për duelet e muajit të ardhshëm.
Francezi Choulet të martën ka publikuar listën e zgjeruar prej 19 lojtarëve, e cila pastaj do të reduktohet në 12-të, ndërsa reagimi i klubit ka ardhur një ditë më vonë.
“Qëndro i fortë, kapiteni ynë. Fatkeqësisht preferencat personale po e dominojnë meritokracinë”, ka shkruar Bashkimi në rrjetet sociale.
Morina është kapiten i Bashkimit dhe ndër lojtarët kryesor të ekipit, i cili këtë sezon nuk di për humbje dhe prinë në tabelë me shtatë fitore në po aq ndeshje.
Morina ka më shumë se një vit që nuk është ftuar te Kosova, pasi herën e fundit ishte pjesë e listës së zgjeruar të ish-selektorit Rami Hadar për parakualifikimet e “Eurobasket 2025”.
Kosova në muajin nëntor, do t’i ketë dy ndeshje në udhëtim në kuadër të parakualifikimeve për Botërorin 2027, ku do të përballet me Zvicrën dhe Irlandën.
