Bashkimi i Prizrenit do të përballet me Trepçën në finalen e Kupës së Kosovës në basketboll, ndeshje kjo që do të luhet më 12 shkurt.
Bashkimi, një ditë pas Trepçës, e siguroi kualifikimin në finale pasi në serinë gjysmëfinale eliminoi skuadrën e Vëllaznimit.
Në palestrën “Sezai Surroi” të stërmbushur në Prizren, Bashkimi mposhti Vëllaznimin në ndeshjen e kthimit me rezultatin 90:73.
Ky rezultat, i mjaftoi Bashkimit për ta shkrirë avantazhin e Vëllaznimit prej nëntë pikëve (80:71) nga ndeshja e parë, të cilën e kishte fituar dy javë më parë në Gjakovë.
Në një atmosferë të zjarrtë, ndeshja ishte tejet e fortë dhe interesante pasi të dyja skuadrat ishin të vendosura të sigurojnë finalen.
Çereku i parë, përfundoi baras (20:20) kurse të dytin e fitoi Vëllaznimi për të shkuar në pushim me një epërsi prej gjashtë pikëve (41:35).
Bashkimi reagoi në dy periudhat e fundit, ku çerekun e tretë e mbylli me nëntë pikë dallim për të shpërthyer në çerekun e fundit – 30:16
Madje, në periudhën e fundit, Bashkimi realizoi pesë tre pikësha për t’u shkëputur edhe më shumë dhe për ta mbyllur ndeshjen me 17pikë epërsi.
Lejson Zeqiri me 22 pikë të shënuara e 5 kërcime ishte më i dalluari te Bashkimi, ndërsa te Vëllaznimi u dallua Jericole Hellems, i cili ndeshjen e mbylli me 22 pikë e 5 kërcime, po ashtu.
