Bashkimi ka triumfuar në derbin e qytetit ndaj Proton Cable Prizrenit me rezultat 82:68.
Bashkimi e nisi ndeshjen për mrekulli, me një seri të jashtëzakonshme 13:2 dhe ishte në epërsi në çerekun e parë, duke e fituar 25:19.
Portokallezinjtë në periudhën e dytë ngritën epërsinë në 42:26, që ishte më e larta në pjesën e parë, sidoqoftë, basketbollistët e Proton Cable Prizrenit ngushtuan paksa epërsinë dhe skuadrat shkuan në pushim me rezultat 43:33.
Në periodën e tretë, u zhvillua lojë kryesisht e barabartë, me Bashkimin që synonte të shkëputej dhe Proton Cable Prizrenin që nuk e lejonte një gjë të tillë dhe shifrat pas 30 minutash ishin 63:50. Në dhjetë minutat e fundit Bashkimi ruajti epërsinë dhe triumfoi 82:68.
Te Bashkimi u dalluan Grant Lozoya me 21 pikë, nëntë kërcime e tetë asistime dhe Erik Copes me 25 pikë e 22 kërcime, kurse te Proton Cable Prizreni u dalluan Urim Zenelaj me 12 pikë e 13 kërcime, Ivan Koljeviq me 13 pikë, pesë kërcime e nëntë asistime dhe Isaiah Kelly me 16 pikë e nëntë kërcime.
Bashkimi ka tri fitore e një humbje, kurse Proton Cable Prizreni ka një fitore e tri humbje.
