Skuadra e Bashkimit do të synojë që përmes terrenit vendas të sigurojë fitoren e parë në fazën e grupeve të FIBA Europe Cup.
Prizrenasit përballen me skuadrën e njohur franceze Dijon, në ndeshjen që zhvillohet nga ora 19:00 në palestrën “Sezai Surroi” në Prizren.
Të dyja skuadrat kërkojnë fitoren e parë këtë edicion në Grupin J të garës evropiane.
“Portokallezinjtë”, që po marrin pjesë për herë të parë në këtë kompeticion, duan të rikthehen te rezultatet pozitive, pasi në dy takimet e para u mundën nga Cibona dhe Reggiana.
Skuadra e Bashkimit, e drejtuar nga trajneri malazez Igor Jovović, do të jetë e kompletuar në këtë përballje, pa asnjë mungesë në formacion.
Në kampionatin vendor, Superligën e Kosovës, Bashkimi ka treguar një fytyrë krejtësisht ndryshe, me bilanc perfekt në tri ndeshjet e para të sezonit.
Fitorja ndaj Dijonit do të ishte një shtysë e madhe për ekipin prizrenas, që kërkon të mbajë gjallë shanset për kualifikim pas një starti të vështirë në grup.
Ndërkohë, kampionia në fuqi Trepça ka nisur ndeshjen ndaj skuadrës polake Anwil, që ka filluar në ora 18:30, dhe mund të ndiqet drejtpërdrejt në platformën “Telkos”.
