Sonte, pritet të kthehet atmosfera e zjarrtë nëtribunat e palestrës “Sezai Surroi” në Prizren.
Prej orës 19:00, skuadra e Bashkimit e pret Trepçën në ndeshjen e tretë finale të play-offit në Superligën e Kosovës në basketboll.
Pas dy ndeshjeve të luajtura deri më tani, njëra në Prizren dhe tjetra në Mitrovicë, rezultati i përgjithshëm është 1:1, me Bashkimin që e ka fituar duelin e parë dhe Trepçën që doli fituese në të dytin.
Bashkimi ka përparësinë e terrenit për shkak se stinorin e rregullt e mbylli në pozitën e parë në tabelë kurse Trepça doli e dyta.
Të dielën e shkuar në Prizren, Bashkimi e mposhti Trepçën84:77 dhe nuk e pati përkrahjen e tifozëve për shkak të dënimit që e mori shkaku i incidentit kundër Pejës.
Bashkimi u dënua me një ndeshje pa shikues dhe dy të tjera pa praninë e tyre në zonën VIP, por këtë herë tribunat pritet ti ketë të stërmbushura.
Po ashtu, Bashkimi pritet ta ketë në dispozicion edhe Lejson Zeqirin, i cili u lëndua në ndeshjen e dytë të luajtur në Mitrovicë të mërkurën mbrëma, të cilën e humbi me shifrat 79:72.
Kështu që, ndeshja e tretë pritet të jetë e fortë dhe shumë interesante sikurse dy të parat, pasi si Bashkimi ashtu edhe Trepça synojnë fitoren.
Bashkimi kërkon fitoren për të avancuar 2:1 dhe për ta ruajtur përparësinë e terrenit, ndërsa Trepça synon ta fitoj të paktën një ndeshje në Prizren për t’ia rrëmbyer këtë përparësi ekipit nga Prizreni.
Skuadra që arrin katër fitore në këtë seri finale, do të shpallet kampione e këtij sezoni, që do të thotë se kjo seri finale mund të shkoj deri në shtatë ndeshje.
Trepça është kampione në fuqi dhe ka dominuar plotësisht vitet e fundit në basketbollin kosovar, ndërsa në këtë sezon tashmë e ka fituar Superkupën dhe Kupën e Kosovës.
Madje, në finalen e Kupës së Kosovës e ka mposhtur pikërisht Bashkimin, ekip që po e kërkon titullin e parë të kampionit që nga viti 2018 dhe të dytin në histori të klubit.
