Skuadra e Bashkimit po avancon 1:0 në serinë finale të play-offit në Superligën e Kosovës në basketboll ndaj Trepçës.
Të dielën mbrëma në palestrën “Sezai Surroi” në Prizren, Bashkimi e fitoi ndeshjen e parë finale mme shifrat 84:77.
Përkundër që ndeshja u luajt pa praninë e tifozëve në palestër për shkak të dënimit të Bashkimit, skuadra nga Prizreni e shfrytëzoi përparësinë e terrenit vendas për ta startuar këtë seri me këmbë të mbarë.
Edhe pse e humbi çerekun e parë dhe të fundit, Bashkimit i mjaftoi çereku i dytë dhe i tretë për ta krijuar epërsinë ndaj Trepçës në këtë ndeshje finale.
Mack Smith dhe Wendell Green, me nga 22 pikë të shënuara secili ishin më të dalluarit te Bashkimi kurse te Trepça u dallua Mikaile Tmusiq me 21 pikë të shënuara.
Tani, seria finale bartet në Mitrovicë, me ndeshjen e dytë që do të luhet mesjavën që po vjen në palestrën “Minatori”.
