Sundimtari i ri ushtarak i Madagaskarit do të betohet si president i vendit të premten, tha ushtria të mërkurën, ndërsa Bashkimi Afrikan pezulloi kombin ishullor pas një grushti shteti që rrëzoi Presidentin Andry Rajoelina.
Kombi i Oqeanit Indian është zhytur në trazirat më të këqija politike në vite, pasi njësia elitare e ushtrisë Capsat mori pushtetin të martën, pak momente pasi parlamenti votoi për të shkarkuar Rajoelinën, i cili duket se ishte larguar nga vendi ndërsa protestat në rrugë u përshkallëzuan.
Ajo bëhet ish-kolonia e fundit franceze që bie nën kontrollin ushtarak që nga viti 2020, pas grushteve të shtetit në Mali, Burkina Faso, Niger, Gabon dhe Guine.
Komandanti i Capsat, Kolonel Michael Randrianirina, i konfirmuar si president nga gjykata e lartë, tha të mërkurën se kalimi në udhëheqje civile do të zgjasë më pak se dy vjet dhe do të përfshijë ristrukturimin e institucioneve kryesore.
“Nuk ishte një grusht shteti, ishte një rast marrjeje përgjegjësie sepse vendi ishte në prag të kolapsit”, tha ai, pasi kishte premtuar zgjedhje brenda 18 deri në 24 muajsh dhe u tha mediave lokale se ishin duke u zhvilluar konsultime për të emëruar një kryeministër dhe për të formuar një qeveri të re.
Tranzicioni do të mbikëqyrej nga një komitet oficerësh nga ushtria, xhandarmëria dhe policia, shkruan The Guardian.
Derisa, marrja e shpejtë e pushtetit ka ngjallur shqetësim ndërkombëtar, Bashkimi Afrikan i tha të mërkurën AFP-së se po pezullonte Madagaskarin “me efekt të menjëhershëm”, ndërsa OKB-ja tha se ishte “thellësisht e shqetësuar nga ndryshimi jokushtetues i pushtetit”.
