Kjo deklaratë e përbashkët e tyre ka ardhur pasi që kjo e drejtë pritet të përfshihet në Kodin e ri Civil, i cili pritet të votohet në Kuvendin e Kosovës, të mërkurën.
“Bashkësia Islame e Kosovës, Dioqeza Prizren – Prishtinë (Kisha Katolike), Kisha Protestante Ungjillore e Kosovës dhe Bashkësia Hebraike e Kosovës shprehin shqetësimin lidhur me projektligjin për ndryshimin e Kodit Civil, pjesa e familjes, ku po rezultohet që të dobësohet përkufizimi dhe funksionimi i martesës në Kosovë”, thuhet ndër tjerash në deklaratë.
Tutje, ato theksojnë se mbesin të bashkuara për të mbrojtur të drejtën e “jetës së fetusit prej ngjizjes tradicionale derisa ai lind, të drejtën e natyrshme gjinore si paracaktim për secilin qytetar”.
Sipas tyre, me miratimin e këtij projektligji që lejon martesën mes gjinive të njëjtë, po “cenohet vullneti i Zotit dhe zbulesa e tij e shenjtë”.
“Bashkësitë fetare të Kosovës mbesin të bashkuara dhe me një zë të vetëm para ligjvënësve të Kuvendit të Kosovës para Qeverisë dhe institucioneve tjera, që të heqin dorë pre çdo ndryshimi, ripërkufizimi, prej çfarëdo riinterpretimi të neneve për statusin e bashkëshortëve në vendin tonë”, thuhet tutje në deklaratë.
