Çdo 31 janar vijnë për homazhe te shtatorja e Zahir Pajazitit, i cili u vra në vitin 1997 nga forcat serbe.
Avni Ajeti ishte një nga bashkëluftëtarët e parë të tij, ku tregon se ai ishte gjithmonë në krye të aksioneve.
“Zahiri e mori përsipër organizimin e njësiteve guerile ku në atë periudhë faktikisht figura e tij dhe roli i tij ishte në momentin kulmin më të madh domethënë që i bashkoi djemtë rreth vetes dhe filloi atentatet në mbi okupatorin e Serbisë”, tha bashkëluftëtari , Avni Ajeti.
Derisa Hasan Zeneli tregon një nga organizimet që kishte ndërmarrë Zahiri bashkë me shokë në atë kohë.
“Fillojmë prej datës 5 shtator 1995 kur Serbia i okupoi dhe mbylli shkollat shqipe dhe i mbushi me kolonë të ardhur nga Kroacia dhe vendet e tjera dhe ne menjëherë morëm vendim dhe hodhëm një bombë, bomba e parë kundër kolonizimit të Kosovës është hudh me 5 shtator 1995 në Podujevë rreth orës 21:30 minuta”, tha Zeneli.
Kurse Isak Shabani rrëfeu se përkundër mungesës së armatimeve, bashkë me Pajazitin gjithmonë kryenin me sukses aksionet.
“Ne vendosëm të fillojmë këtë punë, këtë luftë çlirimtare duke falënderuar Zahirin, pasi që Zahiri e ka thënë gjithmonë një thënie që gjithmonë e citoj: Çdo punë që niset qëllim mirë, përfundon qëllim mirë. Me të vërtetë kjo ka përfunduar mirë përkundër asaj që kemi pasë të bëjmë me një armik shumë të keq përkundër kësaj ne kemi arritë këtë liri të cilën e gëzojmë falë dëshmorëve të kombit”, tha Shabani.
E Shaip Haziri bëri të ditura momentet e fundit, disa minuta para ndarjes së përjetshme me ish-kryekomandantin e tyre.
“Momentin e fundit ka ardhë tash heroi i Kosovës Hakif Zejnullahu dhe na e ka anulu mu dhe Ilirit (Konushefci) shkuarjen me Zahirin edhe në 15:30 kemi insistuar pë së dyti herë që edhe ne të jemi bashkë në udhëtimin e tij të fundit të jetës së tij por prapë ka pasë qëndrim të prerë që jo, do të rrini në Prishtinë unë do të shkoj deri në Vushtrri dhe do të kthehemi kah rruga transit për Podujevë”, tha Haziri.
E homazhe pranë shtatores së heroit Pajaziti bëri edhe e para e shtetit, Vjosa Osmani, e cila tha se liria për të cilën sakrifikoi ai, duhet të mbrohet vazhdimisht.
“…Ideali për të cilin luftoi Zahir Pajaziti me shokë duhet të na shërbejë sidomos ne ditët e sotme, sepse liria e sovraniteti nuk janë të mirëqena. Ato vazhdimisht duhet të mbrohen e të mirëmbahen”, tha presidentja Osmani.
Homazhe bëri edhe kryeministri i Kosovës, Albin Kurti dhe krerë të partive politike të opozitës bashkë me kandidatë për deputetë.
Më 31 janar 1997, Zahir Pajaziti, Hakif Zejnullahu dhe Edmond Hoxha u vranë nga regjimi serb, derisa ishin duke udhëtuar nga Prishtina në drejtim të Vushtrrisë.
