Kryetari i Kuvendit, Dimal Basha, ka njoftuar se i është miratuar kërkesa për të tërhequr Kapitullin 3 nga një punim ku pretendoheshin akuza të rënda ndaj UÇK-së, përfshirë pretendimin se lëvizja ishte financuar me para të drogës.
Emri i Bashës ishte përfshirë më parë si bashkëautor, por ai ka bërë të ditur se tashmë nuk figuron më në publikim. Ngjarja ka shkaktuar reagime të shumta në opinionin publik në Kosovë.
“Dua t’ju informoj se me t’u vënë në dijeni që një punim i imi nga studimet para 13 viteve ishte përfshirë si kapitull i veçantë në kuadër të një publikimi më të gjerë, në të cilin gabimisht isha listuar si bashkë-autor. Unë kam bërë kërkesë tek revista në fjalë që pjesa që kam kontribuar unë, pra Kapitulli 3, të hiqet tërësisht nga ai publikim!”, ka shkruar Basha.
Ai shtoi:
“Komiteti i Publikimeve i revistës në fjalë sot më ka njoftuar që ka miratuar kërkesën time për tërheqjen e Kapitullit 3 nga publikimi, dhe gjithashtu ka hequr edhe emrin tim nga autorësia, meqenëse unë nuk kam autorësi në pjesën tjetër të publikimit, përveç Kapitullit 3 i cili tashmë është tërhequr. Ju falënderoj për mirëkuptimin.”
