Basha theksoi se implementimi i vendimit për targat do jetë mundësia e vetme për të dëshmuar që në Kosovë ka rend dhe ligj.
“A keni parë ndonjëherë opozitën sa ka qenë në pushtet deri në vitin 2019 duke u marrë me këto probleme me Serbinë? A keni parë tendenca për ta implementuar një marrëveshje që ka nënshkruar vetë? Asnjëherë nuk ka ndodhur. Ne nuk do merreshim me këtë çështje të targave, por na kanë lënë në derë. Tash ne duam t’i implementojmë se u ka dalë afati, prandaj duhet të dëshmojmë se ka rend dhe ligj”, deklaroi Basha në emisionin “Infonata” në Tëvë1.
Më tej, Basha tha se një shtet si Serbia që nuk i vë sanksione Rusisë, që u vë zjarr veturave të serbëve që kanë legalizuar tabelat, përsëri ka struktura paralele brenda Kosovës.
“Nëse e përkthejmë logjikën, e shtyjmë afatin e targave për 10 muaj për shkak se Serbia mund ta sulmojë Kosovën, tani nëse ne duam të zbatojmë rend dhe ligj në Kosovë dhe Serbia e sulmon Kosovën, kush do jetë fajtori?”, theksoi tutje deputeti i Vetëvendosjes, raporton teve1.info.
Kujtojmë se Qeveria e Kosovës ka marrë vendim të ri në lidhje me afatin për targat ilegale.
Sipas plani të ri të Qeverisë së Kosovës, për tri javë duke filluar nga data 1 nëntor deri në datën 21 nëntor masa do të jetë ajo e qortimit, pastaj nga 21 nëntori deri më 21 janar do të jetë masa e gjobitjes dhe më pastaj nga 21 janari do të kemi targa provuese për dy muaj të tjerë, pas së cilës datës më 21 prill nuk mund të ketë sepse nuk mund të lejohen targa të tjera në Kosovë. /Teve1.info/
