Produktet kosovare pritet shumë shpejt të pajisen me barkoda ndërkombëtare, falë anëtarësimit të Kosovës në rrjetin global të identifikimit të produkteve GS1.
Kryetari i Odës Ekonomike të Kosovës (OEK), Lulzim Rafuna, ka zhvilluar një takim me kryetaren e Fondacionit GS1 Turqi, Elif Muftuoglu, ku është diskutuar për finalizimin e këtij procesi.
Gjatë takimit, Rafuna ka shprehur falënderim dhe mirënjohje për mbështetjen që GS1 Turqia i ka dhënë Kosovës në rrugën drejt anëtarësimit në këtë sistem ndërkombëtar, i cili mundëson identifikim dhe njohje globale të produkteve.
“Falë këtij bashkëpunimi, GS1 Kosova do të fillojë së shpejti lëshimin e barkodave ndërkombëtare për produktet vendore, duke u hapur atyre rrugë për prezencë më të gjerë në tregjet evropiane dhe botërore. Ky hap pritet të rrisë vlerën, besueshmërinë dhe konkurrueshmërinë e produkteve ‘Made in Kosova’, duke përfituar si konsumatorët vendorë ashtu edhe ata ndërkombëtarë”, thuhet në njoftim.
