Mbrojtësi i krahut, Sergino Dest, më nuk është pjesë e skuadrës së Barcelonës.
Ekipi nga Spanja, të hënën, e ka konfirmuar largimin e reprezentuesit të SHBA-së. Dest është transferuar te skuadra e PSV Eindhovenit.
Ai është huazuar tek ekipi holandez, i cili ka opsionin e blerjes së tij verën tjetër për 10 milionë euro. 22-vjeçari nuk ka bërë pjesë në planet e trajnerit Xavi Hernandez dhe për këtë arsye është larguar nga “Camp Nou”. Ai edhe edicionin e shkuar ishte i huazuar te Milani, por ekipi italian nuk e bleu kartonin e tij.
Dest ka kontratë me Barcelonën deri në vitin 2025, ndërsa ekipit spanjoll iu bashkua në vitin 2020 nga Ajaxi për 21 milionë euro. Dest, në total ka 51 paraqitje për Barçën.
