Barcelona – Inter, është gjysmëfinalja tjetër e Ligës së Kampionëve, që edhe po cilësohet si “finale para finales”.
Dueli i parë gjysmëfinal mes këtyre dy skuadrave, do të luhet sot prej orës 21:00, me Barcelonën që e pret Interin në Spanjë.
Barcelona është maksimalisht e motivuar dhe në këtë ndeshje futet pas triumfit në Kupën e Spanjës, ku në finale e mposhti Real Madridin me rezultatin 3:2.
Në anën tjetër, Interi nuk është në seri të rezultateve pozitive, pasi në vikend pësoi në kampionat nga Roma kurse javën e shkuar u eliminua nga Milani në gjysmëfinale të Kupës së Italisë.
Megjithatë, Interi ka treguar formë të mirë në Champions këtë sezon, ku i ka regjistruar 6 ndeshje pa humbje, përfshirë fitoret ndaj Feyenoordit e Bayernit në fazat e eliminim direkt.
Kjo është përballja e parë mes Barcelonës dhe Interit në fazën e eliminimit direkt që nga sezoni 2009/10 kur italianët atëbotë nën drejtimin e Jose Mourinhos patën eliminuar spanjollët në gjysmëfinale.
Trajneri i Interit, Simone Inzaghi nuk do ta ketë në dispozicion Benjamin Pavardin për ndeshjen e parë, ndërsa Federico DiMarco e Marcus Thuram mbeten në dyshim edhe pse janë stërvitur me ekipin.
Në anën tjetër, Barcelonës i mungon sulmuesi Robert Lewandowski dhe mbrojtësi Alejandro Balde.
