Tash e tri vite ujin duhet të siguroj përmes këtyre cisternave.
Ilmi Pllana i cili banon në lagjen “Kodra e Trimave” në Prishtinë është duke u përballur me mungesë të ujit të pijshëm.
Për shkak të popullimi të kësaj lagje, Pllana si dhe shumë banorë të tjerë të rrugës “Nebil Duraku” duhet të gjejnë alternativa tjera për tu furnizuar me ujë.
“Që dy tri vjet qitu shtypje nuk kemi, pompat i kemi ngjite, por nuk e vjen hiq. Unë jam më se larti edhe kemi lajmëruar, me rregull e paguaj. Prej Siqeve një baxhanak ma bien ujin gjithë i mbushi këto cisternat, i kemi lajmërua disa herë por kush nuk e merr këtë punë për sipër”, thotë banori, Ilmi Pllana.
Pllana është i detyruar që çdo dhjetë ditë të mbushë tri cisternat të cilat i ka të vendosura në oborrin e shtëpisë.
“Një cisternë 1 mijë litrave pesë ditë më bënë, çdo 10 ditë ma bienë ai prej Siqeve me kamionët. Edhe në Siqevë shkoj marrë me pijë. Nuk pihet hiq këta uji se era”, tregoi ai.
Shtypja e ujit e cila iu vjen nuk është e mjaftueshme për të aktivizuar bojlerët e makinat të cilat i përdor për pastrim të rrobave.
“Nuk ka shtypje se nuk po i qel as bojlerët as makinat, as asgjë. Tash janë ndal se zheg se kur të vijën prej pune nuk ka shancë më pas uji deri në dy të natës”.
Nga Kompania Rajonale e Ujësjellësit Prishtina, nuk premtojnë një zgjidhje të shpejtë të këtij problemi.
“Këtu është një rrjet qe duhet të ndërrohet pasi rrjeti aktuali nuk e përballon, e gjithë kjo për shkak të rritjes së numrit të konsumatorëve. Ndërrimin e rrjetit planifikojmë ta bëjmë në fillim të vitit të ardhshëm”, tha Arjeta Mjeku, zëdhënëse në KRU “Prishtina”.
Në këtë lagje rreth 20 shtëpi janë duke u përballur me mungesë të ujit.
