Ka pesë ditë që është duke rrjedh ky ujë.
E si shkak i dëmtimit të këtij gypi banorët e një kompleksi banesor në rrugën “Ali Sokoli” në “Breg të Diellit” në Prishtinë kanë mbetur pa ujë.
Ata madje po detyrohen që ujin e mbledhur nga katet e tyre ta largojnë.
I shqetësuar nga ky problem është edhe banori Isak Shala.
“Që pesë ditë kem telashe me ujë, përndryshe unë banoj në katin e pestë. Ujin na e kanë ndal, nuk e di ku është problemi, ne jemi tu e ble ujin qe pesë ditë, ujë s’kemi hiç”, tha banori Isak Shala.
Ai madje tregoi se këtë problem e kanë adresuar edhe në Kompaninë Rajonale të Ujësjellësit “ Prishtina”.
“E kanë lajmëruar edhe ujësjellësin, ata kanë thënë që na nuk kemi qasje, çështja jonë është deri tek ora e prej orës është çështje e brendshme e vet banorëve”, tha Shala.
E hallin e njëjtë e ka edhe ky banor por ai thotë se tashmë veç është mësuar me ndërprerje të tilla.
“Kemi pas telashe s’kemi pas hiç ujë edhe në mbrëmje edhe gjatë ditës nuk kemi pas. Si çdo herë se jemi mësuar ne me këto ndërprerje edhe e kam rezervarin”, tha banori tjetër, Valdet Gjota.
Ndërsa për këtë problem nga KRU “ PRISHTINA” kanë thënë se janë vet banorët që duhet zgjidhur pasi që është çështje e brendshme e tyre.
“Aty është një rrjedhje e brendshme, gjë qe nuk është përgjegjësi e jona me e sanuar brenda. Por, meqë është rrjedhje e brendshme dhe qe te mos rrezikohen banoret e kemi ndal ujin deri ne sanimin e gjendjes”, tha zëdhënësja e KRU “Prishtina”, Arijeta Mjeku.
Megjithatë, KRU “Prishtina” ka dërguar një ekip të intervenojë në vendin e ngjarjes për shkak të emergjencës që është paraqitur.
