Që nga dita e diele, një pjesë e banorëve të Lagjes Ulpiana në Prishtinë janë duke u përballur me probleme të energjisë elektrike.
Një fazë e rrymës nuk është duke ju funksionuar banorëve të hyrjes D2 në këtë lagje.
E kjo po i paraqet telashe të mëdha atyre.
“Rrymë nuk kemi prej të dielës na është ndalur një fazë nuk punon edhe po kemi telashe probleme për shkak të frizave e frigoriferëve të gjitha këto janë të lidhura më të, dhe në përgjithësi kuzhina”, ka deklaruar banori i lagjes, Izet Smajli.
Izet Smajli thotë se disa herë kanë kontaktuar Kompaninë Kosovare për Distribuim me Energji Elektrike (KEDS) por të njëjtit nuk kanë ndërmarrë asnjë veprim.
“Me thirr i kemi thirr disa herë edhe veç thonë po po edhe kështu nuk janë ardhur, Mirëpo kur po ndodhë për pagesë kanë ndodhur për 30 euro në muaj veç që është vonuar një ditë jo më shumë kanë ardhur dhe ja kanë këputur por dëmin tonë askush nuk na paguan”.
Pas interesimit të tëvë 1, Kompania Kosovare për Distribuim me Energji Elektrike në Kosovë (KEDS) ka bërë të ditur se ekipet do të dalin gjatë ditës në terren.
“Rasti është raportuar. Besoj sot një ekip del në vend për të verifikuar gjendjen. Varësisht nga gjendja edhe vepron”, ka deklaruar zëdhënësi i KEDS, Lulzim Krasniqi.
Për shkak të ngarkesës me energji elektrik në fund të vitit 2024 shumë qytetarë në Kosovë kanë pasur telashe me energji elektrike.
