Banorët e Rugovës së Pejës përmes një letre kanë kërkuar nga deputetët e Kuvendit që të votojnë kundër miratimit të Planit Hapësinor për Parkun Kombëtar “Bjeshkët e Nemuna”.
Pika për miratimin e këtij plani është sot në rendin e ditës në Kuvend.
Përfaqësuesi i banorëve, Veton Mujaj ka shkruar se ky është një plan i keq, i elaboruar nga një ligj i keq që për më shumë se 10 vjet ka shkatërruar hapësirën e këtij Parku.
“Ata duhet ta kthejnë mbrapsht këtë plan te Qeveria dhe t’i thonë se ky akt nënligjor nuk mund të bëhet pa ndryshimin e Ligjit për Parkun Kombëtar “Bjeshkët e Nemuna”. Ata që bëjnë ligjet do të duhej që sot t’i kapërcejnë dallaveret e qeveri pas qeverie dhe të marrin për bazë të mirën e zhvillimit të kësaj zone të cilën e shkatërruan qeveritë tona për më shumë se 20 vjet rresht”, ka shkruar Mujaj.
Teksa ai i ka publikuar edhe tri kërkesat e banorëve të fshatit.
