Konflikti mes Komunës së Prishtinës dhe ndërmarrjes “Pastrimi” në lidhje me pagesat e faturave, kanë vënë në konfuzion qytetarët.
Që të dyja institucionet po kërkojnë që pagesa të bëhet tek to.
Qytetari Vesel Veseli thotë se nuk e ka ndërmend të paguaj faturën deri në momentin kur ndërmarrja ‘Pastrimi’ e Komuna e Prishtinës të gjejnë një zgjidhje.
“Deri më tash gjithmonë ka ardh vetëm një faturë, por në atë kohë ishte ‘Pastrimi’, edhe e dinim që ajo ishte kompani e caktuar legale nga Komuna ku ti paguajmë mbeturinat, tani po na vijnë nga dy. E unë nuk e kam mendjen me paguar deri sa të definohet siç ka thënë kryetari i Komunës së kush është përgjegjës e kujt me ju paguar mbeturinat”, shprehet ai.
Paqartësi për pagesën e mbeturinave ka edhe Islam Ajeti.
“Deri këtë vit faturat i kemi paguar në Komunë, këtë vit dëgjova prej banorëve se jam përgjegjës edhe i objektit ku banoj, me lajmëruan që fatura ju kanë ardh edhe pse kanë paguar faturat. Ka edhe të atilla raste që kur ka shkuar zero ka qenë fatura, por një marrëveshje që e kemi bërë ne nuk do të paguam faturë të mbeturinave fare deri sa ata të merren vesh ndërmjet vete”, thotë ky qytetar.
Por për dallim nga këta dy qytetar, zonjës Esma Rugova ka kohë që nuk i është dërguar asnjë faturë për pagesë të mbeturinave.
E madje ajo është në mëdyshje se ku po shkon pagesa që ajo po e kryen për këtë shërbim.
Moti nuk na kanë ardh diçka po të tregoj drejtë moti nuk kanë ardh nuk e di qysh e tek. Nuk e di se ku shkojnë ato tash, ne me i paguar nuk e di çfarë kuptimi ka, nuk e di ku duhet. Duhet nëpërmjet televizorit apo diçka me na lajmëruar se çka me bo e tek me ditë edhe ne ku me u gjind e si me u gjind. Se nuk jemi për mos me paguar, duhet me paguar se askush nuk e do qytetin e papastër”, shprehet Rugova.
Por për këtë situatë të krijuar nga ndërmarrja ‘ Pastrimi’ kanë një përgjigje.
“Njoftim për qytetarët e Prishtinës: Pagesat për mbeturina bëhen vetëm përmes KRM “Pastrimi” Sh.A. Me shqetësim kemi pranuar njoftimin e lëshuar më 26 shkurt 2025 nga Drejtoria e Shërbimeve Publike në Komunën e Prishtinës dhe komunikimet zyrtare nga Zyra e Drejtorit të Shërbimeve Publike, në të cilin u kërkohet qytetarëve të kryeqytetit që të paguajnë faturat për mbeturina ndaj Komunës së Prishtinës”, ka shkruar Petrit Reçica nga kompania “Pastrimi”
E të drejtë për faturim të mbeturinave ndërmarrjes “ Pastrimi’ po i jep edhe avokati Ardian Bajraktari.
“Me sa di është lëshuar rregullorja në kuadër të Kuvendit Komunal të Prishtinës e kjo e drejtë i takon kompanisë së ‘ Pastrimi’. Mirëpo megjithatë këto dy institucione duhet të ulën sa më parë të diskutojnë të gjejnë një zgjidhje dhe t’i eliminojnë këto paqartësia”, vlerëson avokati.
I gjithë problemi ka nisur pasi Asambleja Komunale ka ndryshuar rregulloren, me të cilën nuk po pajtohet Komuna e Prishtinës.
Rasti është në Gjykatën Kushtetuese.
