Ka pesë ditë që po blejnë ujë për pije.
Por banorët e fshatit Miradi e Poshtme, ujë nuk kanë as për t’u pastruar.
E kjo për ta është shqetësuese.
“Natën jemi pa ujë krejt, ndërsa ditën nuk mundemi as mu pastru, as rroba as sen me bë me të sepse nuk ka shtypje. Na kemi fëmijë, kemi pleq, pa pastru, nuk mundemi të jetojmë kështu”, tha banori Ibush Krasniqi.
Për këtë problem, ende nuk është ndërmarrë ndonjë veprim, ani pse thonë se ballafaqohen që disa vite.
“Nuk kanë ndërmarrë kurrfarë veprimi hiq, kem problem me gypa, janë të vendosur pas luftës, një kualitet shumë i dobët, që kur pëlcasin gypat nuk kemi ujë ka 10 ditë, e vërshon krejt fshatin uji”, tha ai.
E dikush tjetër, që gjatë gjithë ditës punon, por ujin i duhet ta blejë në market, ka disa fjalë për deputetët.
“Që prej të shtunës nuk ka hiç. Dmth çka është prish nuk e di, kërkush nuk ka qenë. Prej të shtunës deri sot nuk ka. Knej votat po i lypin, po për vota krejt po ngajnë, e kjo nuk është me të drejtë”, tha banori tjetër, Haki Gjyrevci.
Por nga KRU “Prishtina” kanë një sqarim.
“Nga dita e shtunë në mbrëmje është djegur pompa për furnizim me pije në fshatin Miradi e Ulët. Nga e diela ekipet e mirëmbajtjes janë duke instaluar pompën e re. Për momentin jemi duke e furnizuar nga Kroni Kuzmin nga ku edhe kemi reduktime”, thuhet në njoftimin e tyre.
Nga kjo kompani po shpresojnë që nuk do të ketë vonesa, e furnizimi me ujë do të kthehet shumë shpejt.
