Kampioni në fuqi i Kosovës në futboll, Ballkani, ka bërë hap prapa në garën për titull.
Ballkani i drejtuar nga trajneri Orges Shehu u mposht të dielën në udhëtim nga Malisheva me rezultatin 3:1.
Kjo ndeshje i takoi javës së 22-të të elitës së futbollit kosovar. Vendësit kaluan të parët në epërsi me golin që e shënoi Arlind Veliu në minutën e 23-të. Mysafirët shifrat i barazuan në minutën e 37-të. Geralb Smajli realizoi për 1:1. Për 2:1 shënoi Drilon Hazrollaj në minutën e 70-të. Golin përfundimtar e realizoi Altin Aliu në minutën e 91-të.
Ballkani nga minuta e 87-të ishte me një futbollist më pak në fushë pasi Bernard Karrica u ndëshkua me karton të kuq. Skuadra nga Suhareka mbetet në vendin e dytë me 39 pikë, dy më pak i ka Malisheva në pozitën e tretë.
Ndërkohë, skuadra e Dritës nuk ka gabuar në ndeshjen e xhiros së 22-të të Superligës së Kosovës në futboll.
Drita të dielën pasdite e mposhti në shtëpi Ferizajn me rezultatin 2:0. Me fitore skuadra gjilanase ka bërë tjetër hap pozitiv në garën për titull.
Albert Dabiqaj ishte realizatori i golit të parë në minutën e 57-të. Goli përfundimtar u shënua nga Veton Tusha në minutën e 70-të. Për Dritën ishte ndeshja e shtatë rresht pa humbje në të gjitha garat.
Drita mbetet e para në tabelë me 50 pikë.
