Kampioni i Kosovës në futboll, Ballkani po synon që në tentimin e tretë ta kaloj me sukses raundin e parë kualifikues të Ligës së Kampionëve.
Në dy sezonet paraprake, Ballkani është eliminuar në këtë raund për t’i vazhduar garat në Ligën e Konferencës, në të cilën ka luajtur dy herë në fazën e grupeve.
Këtë sezon, Ballkani mund të avancoj në raundin e dytë kualifikues të Championsit pasi në të parin do të përballet me kampionin e Andorrës, Santa Coloman.
Ballkani vlerësohet favorit ndaj Santa Colomas dhe këtë pritet ta dëshmoj qysh në ndeshjen e parë. Për dallim prej Ballkanit, Santa Coloma nuk e ka fituar asnjë ndeshje në 16 sosh sa i ka luajtur në Kupat e Evropiane, duke i humbur të gjitha.
Dueli i parë mes këtyre dy skuadrave luhet sot prej orës 20:00 në Andorrë, ndërsa ai i kthimit pas një jave në Kosovë.
Me kalimin eventual të fazës së parë kualifikuese të Ligës së Kampionëve, Ballkani siguron play-offin e Ligës së Konferencës, nëse gjatë këtij rrugëtimi evropian eliminohet në Champions apo Ligën e Evropës.
Para Santa Colomas, Ballkani në këtë raund kualifikues të Ligës së Kampionëve është përballur me Ludogoretsin e Bullgarisë dhe Zhalgirisin e Lituanisë, kundërshtarë që e kanë eliminuar ekipin nga Suhareka.
Skuadra e trajnerit Ilir Daja ka pësuar ndryshime të mëdha në përbërje pas largimit të lojtarëve kryesor si Edvin Kuç, Armend Thaqi, Nazmi Gripshi e Lumbardh Dellova por është gati për ta prezantuar veten në sezonin 2024/25 me ardhjet e reja që ishin të shumta.
Krahas Ballkanit, në kualifikimet e Ligës së Kampionëve, saktësisht në raundin e parë do të paraqiten edhe tre kampionë të tjerë shqiptarë, Deçiqi i Tuzit, Struga dhe Egnatia e Rrogozhinës.
