Pasi u paraqit për dy vjet rresht në fazën e grupeve të Ligës së Konferencës, Ballkani i Suharekës një sukses të tillë e synon edhe në këtë sezon të garave të UEFA-s.
Nënkampioni i Kosovës, këtë herë do të paraqitet prej raundit të dytë kualifikues të Ligës së Konferencës dhe ndihet plotësisht i gatshëm për aventurën evropiane pasi ka më shumë se një muaj që ka nisur përgatitjet.
Sot, në stadiumin “Fadil Vokrri” në Prishtinë përballet me FC Floriana të Maltës, ndeshje kjo që nis prej orës 20:30.
Në konferencën për shtyp të Ballkanit, trajneri Orges Shehi insistoi se ekipi I tij është i uritur për sukses, ndërsa shtoi se është optimist se do ti fitojnë të dyja ndeshjet e këtij raundi për të avancuar në rrethin e tretë kualifikues.
Te Ballkani vlerësojnë lart FC Florianan, ekip që ka 26 tituj kampioni dhe 21 herë ka triumfuar në Kupën e Maltës, por shtuan se synimi është të avancojnë tutje.
Optimizmin e tij për të prekur për herën e tretë fazën e grupeve të kësaj gare të UEFA-s, e shprehu edhe kapiteni Bajram Jashanica, duke shtuar se përvoja e viteve të kaluara do ta ndihmoj ekipin në arritjen e objektivave.
Ballkani për herë të parë u paraqit në fazën e grupeve të Ligës së Konferencës në sezonin 2022/23, sukses që e përsëriti edhe në sezonin 2023/24.
