Ish-deputeti i Kuvendit të Kosovës nga radhët e komunitetit boshnjak, Numan Balic, thotë se rezoluta për gjenocidin serb në Srebrenicë nuk është fitore diplomatike vetëm për Bosnjën, por për të gjitha shtetet të cilat e kanë përkrahur votimin.
Balic thotë se rezoluta sado të është e suksesshme, prapë nuk beson që do t’i ndihmojë shumë boshnjakët që e kanë përjetuar gjenocidin.
“Kjo nuk është vetëm fitore diplomatike e Bosnjës, por edhe e shteteve shqiptare, shteteve të Evropës Perëndimore, të ShBA-së, një pjesë të shteteve islamike dhe vendeve të tjera të botës, të cilat e kanë përkrahur. Nga na pragmatike unë jam shumë mirënjohës për atë që e njeh situatën në Bosnje dhe e din që pasojat janë katastrofale dhe që do ta pësojnë me vite dhe dekada të tëra. Rezoluta sado që është e mirë dhe e suksesshme, nuk besoj që do ta ndihmojë shumë, pikërisht ata që e kanë përjetuar gjenocidin. Më vjen keq, por edhe brenda Bosnjës ka dallime. Ju keni qytete që kanë përjetuar krimet. Problemi është se nuk është vetëm Srebrenica, kjo ka ndoshta vetëm 10 për qindshin e njerëzve që janë vrarë, 90 për qind janë në qytetet tjera…”, tha ai në emisionin “Këndi i Debatit” në Tëvë1.
Ish-ministri i Shëndetësisë potencoi se prapë kjo rezolutë është një lehtësi dhe fitore e Bosnjës përkundër agresorit të krimit dhe shteteve përkrahëse të Serbisë.
“Kjo është një lehtësi, një fitore, një ndjenjë e suksesit, një ndjenjë superioritete dhe fitore ndaj agresorit të krimit dhe shteteve përkrahëse të Serbisë. Por, në anën tjetër mbetet një hidhërim që akoma ndoshta 1/3 e Bosnjës nuk ka asnjë të kthyer në Srebrenicë, pra është e boshatisur prej boshnjakëve”, tha ai.
Sot, Asambleja e Përgjithshme e Kombeve të Bashkuara miratoi rezolutën, sipas së cilës 11 Korriku shpallet Ditë Ndërkombëtare e Përkujtimit të Viktimave të Gjenocidit në Srebrenicë.
Ndër tjerash kjo rezolutë dënon mohimin e gjenocidit dhe madhërimin e kriminelëve të luftës. Miratimi i kësaj rezolute u kundërshtua nga Serbia, derisa shtetet nismëtare, thanë se ajo nuk është kundër asnjë shteti, por shënjestron kryesit e gjenocidit./teve1.info/
