Deputetja e Lidhjes Demokratike të Kosovës, Hykmete Bajrami, ka thënë se Qeveria Kurti me propagandë po mundohet t’i bindë qytetarët për progresin ekonomik në vend, derisa i ka quajtur “kampionë të zhgënjimit”.
Madje sipas saj, Kosova po qeveriset nga disa praktikantë me rregulla dhe urdhra të “komiteteve”.
“Vetëm 40 milionë euro janë shpenzuar për investime kapitale në tremujorin e parë të këtij viti e qeveria me propagandë mundohet t’i bindë qytetarët për progresin e pashembullt ekonomik në vend. Sot, të gjithë jemi të vetëdijshëm se gjendja ekonomike dhe gjendja në institucione është në pikën me të ultë që nga paslufta. Po na qeverisin praktikantët me rregullat dhe urdhërat e ”komiteteve”, andaj edhe s’ka si të jetë ndryshe. Jeni kampionë të zhgënjimit”, ka shkruar Bajrami në Facebook.
Njëherit, Bajrami ka shtuar se nga vendi po ikin profesionistët shëndetësor, mësuesit e punëtorët e administratës, të cilët sipas saj, më herët ndiheshin të sigurt dhe e planifikonin jetën në Kosovë.
“Na kujtohet se si LVV pat premtuar kthimin e trurit në Kosovës dhe shihni se çfarë po ndodhë. 11 ministri janë me ushtrues detyre të pozitës së sekretarit të përhershëm – pozitës me të lartë ekzekutive në ministri, Fondi Pensional pa bord, Banka Qendrore pa guvernator, Komisioni i Ndihmës Shtetërore jo funksional, Njësia e Inteligjencës, Financiare pa drejtor, Administrata Tatimore pa drejtor. A ju shqetëson fakti se askush s’po dëshiron të punojë me ju dhe për ju? Çka ndodhi me mbështetjen e madhe që kishit dikur?!”, ka shkruar tutje Bajrami./teve1.info/.
