Ish-ministrja e Arsimit, Hykmete Bajrami, thotë se dështimin e Ministrisë së Arsimit do ta paguajnë fëmijët dhe prindërit e tyre.
Sipas Bajramit, është e gabuar nisma e kësaj ministrie që t’i ngarkojë prindërit me blerjen e librave shkollor vetëm një javë para se të nisë procesi mësimor.
Ajo thotë se kjo nismë do të ketë pasojë për gjithë sistemin e posaçërisht për nxënësit dhe prindërit.
“Shteti nuk duhet t’i nënshtrohet asnjë shantazhi dhe as kushtëzimeve eventuale nga ndonjë shtëpi botuese, por vendimet për gjëra kaq të rëndësishme për procesin mësimor duhet të merren shumë kohë më parë, të bëhen përgatitje dhe të mos pësojë gjithë shoqëria”, ka shkruar ajo në Facebook.
Bajrami, thotë se në MAShT ka dështim, dhe pyet se çka nëse mjetet financiare që i shpërndajnë për këtë qëllim nuk do të mjaftojnë:
“Çka nëse s’ka libra mjaftueshëm në treg për nxënësit? Mungesat e librave në treg do të jenë të paevitueshme sepse shtëpitë botuese nuk do të printojnë libra pa u siguruar që do të ketë kërkesë, e kërkesa e prindërve do të dallojë nga ajo e MASHT-it. Kush garanton se këto shtëpi botuese kanë me ulë çmimin në rast se librat blihen nga prindërit? Kush e përcjellë tregun? Kush e monitoron furnizimin me libra të fëmijëve?”.
Tutje, ajo i është drejtuar ministres së Arsimit, Arbërie Nagavci, duke i thënë që “mos i merr në qafë fëmijët sepse kanë humbur një muaj mësim vitin e kaluar. Mos i lë fëmijët pa libra se këtë nuk ta kanë borxh”./teve1.info/
