Deputetja e Lidhjes Demokratike të Kosovës dhe ish-ministrja, Hykmete Bajrami ka reaguar pas aksionit të sotëm të Policisë, ku mbeten të arrestuar dy zyrtarë të MINT-it dhe Ridvan Muharremi pronarë i “Bukë e Zemër” nën dyshimet për keqpërdorime me rezervat shtetërore.
Bajrami në reagimin e saj tha se përgjegjësi kryesor është kryeministri Albin Kurti dhe se sipas saj, secili që ka përgjegjësi duhet të japë llogari në mënyrë që siç tha ajo, të kthehet besimi i qytetarëve se në këtë vend ka drejtësi dhe se “hajnat shkojnë në burg”.
“Përgjegjësinë kryesore duhet ta kërkojmë te Kryeministri Albin Kurti. Kryetari i Vetëvendosjes është kryepërgjegjësi për funksionimin e secilit dikaster, është përgjegjës edhe për keqpërdorimin e rezervave shtetërore, duke marrë për bazë faktin se një mik i tij komplet jashtë institucioneve përfshihet në tenderë. Ai dhe ministrat e tij duhet gjithashtu të mbahen përgjegjës për përfshirjen e zyrtarëve të Vetëvendosjes në kontrabandë me drogë, për koordinimin e Mimoza Kusarit me Radojcicin, për hajnitë në KEK për nepotizmin dhe të gjitha skandalet tjera”, tha ajo.
“Secili që ka përgjegjësi duhet të japë llogari në mënyrë që të kthehet besimi i qytetarëve se në këtë vend ka drejtësi dhe se hajnat shkojnë në burg. Sepse i ka marrë 51 për qind të votave me propagandë që kushdo që s’është me LVV është hajn dhe të gjithë ata që ju bashkuan turmës me 14 shkurt 2021 janë pastërtia vet, por në fakt pushteti i Vetëvendosjes po kundërmon drogë, korrupsion dhe pazarllëqe në kurriz të popullit”, tha tutje Bajrami./teve1.info./
