Deputetja e LDK-së, Hykmete Bajrami ka thënë se Lidhja Demokratike e Kosovës do të bëjë kallëzim penal ndaj Albin Kurtit si kryeministër në detyrë dhe deputetëve të Vetëvendosjes që kanë ushtruar pozita të ministrave.
Kjo, siç ka thënë ajo, për shkak se ata kanë ushtruar mandatin për një periudhë që nuk është e lejuar.
“U transmetua kinse kemi ndryshuar qëndrim, si grup parlamentar por në fakt nuk kemi ndryshuar qëndrim, janë krijuar rrethana të reja. Komisioni për verifikim të mandateve është mbledhur dhe ka bërë evidentimin e deklaratave publike të kryeministrit dhe ministrave dhe i ka pranuar të njëjtat si dorëheqje dhe unanimisht në Komision është votuar raporti, e kemi thënë edhe në takimin konsultativ me partitë politike se nëse raporti votohet në Komision për verifikim të mandateve, mandej Grupi Parlamentar i Lidhjes Demokratike do të votojë, por më lejoni të iu informoj edhe një gjë të tillë kjo nënkupton se Komisioni për Verifikim të mandateve i ka njohur si faktike dorëheqjet deklarative të kryeministrit dhe ministrave që nënkupton se nga data 27 mars kur është bërë certifikimi i zgjedhjeve të gjithë këta që e kanë bërë betimin kanë bërë shkelje duke ushtruar funksionin e kryeministrit respektivisht ministrave dhe LDK-ja do të bëjë kallëzim penal lidhur me ushtrimin e mandatit që këta e kanë bë nga data 27 mars deri më sot”, ka deklaruar Bajrami./teve1.info/
