Deputetja e Lidhjes Demokratike të Kosovës, Hykmete Bajrami, ka vendosur sot flamurin kombëtar shqiptar në foltoren e Kuvendit të Kosovës, si shenjë proteste ndaj, siç tha ajo, keqpërdorimit të këtij simboli nga kreu i Vetëvendosjes, Albin Kurti.
Ajo deklaroi se Kurti e përdor flamurin vetëm kur i nevojitet dhe se qytetarët nuk duhet ta lejojnë një gjë të tillë.
“Nuk duhet me e leju që ai me u mbështjellë me flamurin KuqeZi, sa herë që ka nevojë,” u shpreh Bajrami, ndërsa vijonte fjala pas një ndërprerjeje të shkurtër të seancës nga kryesuesi.
Në vazhdim të fjalimit, Bajrami akuzoi Kurtin për shkelje të rendit kushtetues dhe mosrespektim të vendimeve të Gjykatës Supreme.
“Albin Kurti nuk i njeh vendimet e Gjykatës Supreme. Ai e ka kthyer shtetin e Kosovës në një ‘tavolinë suedeze’. Kjo është kambanë alarmi për të gjithë ne,” tha ajo.
Deputetja e LDK-së bëri thirrje për bashkim të forcave politike për ta ndalur këtë situatë, duke shtuar se partia e saj ka dorëzuar 17 kallëzime penale në Prokurori më 8 maj, për siç tha ajo, mbajtje të paligjshme të dy pozitave dhe ndarje të buxhetit në baza të dyshimta.
“Na janë premtuar shumë gjëra, por vendimet e paligjshme dhe arroganca politike nuk duhet të tolerohen më,” përfundoi Bajrami.
