Deputetja e LVV-së, Arta Bajralia ka thënë se raporti për kontrata njëburimore ka dhjetë muaj që është publik dhe sipas saj, nuk është dashur seancë e jashtëzakonshme për të diskutuar për të.
Bajralia duke iu drejtuar deputetes së LDK-së, Hykmete Bajrami tha se opozita e ka hallin në kauza “falso“ që sipas saj po mundohet t’i ndërtojë e që fatmirësisht nuk po iu funksionojnë, shkruan teve1.info
“ A ka qenë vërtetë e nevojshme thirrja e kësaj seance dhe trajtimi i kësaj pike të rendit të ditës me seancë të jashtëzakonshme. Po e përsërisë prapë, ka 10 muaj që raporti është publik dhe nuk është thënë asnjë fjalë për të dhe tani po e trajtojmë në seancë të jashtëzakonshme një raport që do të vinte gjithsesi në seancë të rregullt. Nuk e kuptojë se ku është relevanca e kësaj seance dhe opozitë-bërjes tuaj në vend që të kemi seancë të rregullt ku i trajtojmë dhe i votojmë marrëveshjet ndërkombëtare që po presin mbi një vit pa u votuar, ligjin dhe çështje të tjera. Ju e keni hallin të kauzat falso që po mundoheni të i ndërtoni, e të cilat fatmirësisht nuk po iu funksionojnë”, ka deklaruar ajo në Kuvend.
Ndryshe, deputetja Bajrami ka thënë se këto kontrata janë burim i korrupsionit.
“Grupi parlamentar i LDK-së i mbështetur edhe nga grupet e tjera opozitare ka kërkuar seancë të jashtëzakonshme për numrin e madh të kontratave njëburimore të nënshkruara nga qeveria Kurti 2. Janë nënshkruar mbi 1 mijë e 800 kontrata njëburimore në vlerë prej mbi 240 milionë euro. Këto kontrata janë burim i korrupsionit”, tha Bajrami./teve1.info
