Avokati, Ardian Bajraktari vlerëson se Komisioni Qendror i Zgjedhjeve nuk e ka administruar mirë procesin paszgjedhor.
Sipas Bajraktarit KQZ-ja ka pasur katër vite kohë për t’u përgatitur si për procesin e votimit ashtu edhe për procesin e numërimit.
“Procesi pasues pas përfundimit të votimit është shoqëruar me disa telashe të cilat pastaj kanë rezultuar edhe me disa vonesa. Ecuria në bindjen time nuk ka qenë mjaftueshëm e administruar mirë nga KQZ-ja, për faktin se si rrallëherë pas pavarësisë thuajse asnjë palë zgjedhje nuk kemi pasur zgjedhje të rregullta që nënkupton që KQZ-ja ka pasur kohë të mjaftueshme edhe për procesin e votimit por natyrisht edhe për procesin pasues i cili natyrisht është jashtëzakonisht i rëndësishëm”, ka deklaruar ai në emisionin “Ditari” në Tëvë1.
I pyetur nëse ndërhyrja në ueb-faqen e KQZ-së në ditën e zgjedhjeve e cenon integritetin e votës, Bajraktari ka thënë se nuk mendon që një gjë e tillë mund të ndikoj.
“Integriteti i votës kam përshtypjen që nuk mund të cenohet për faktin se votat ndodhen në kutitë e votimit pas përfundimit të procesit të votimit, janë numëruar votat në vendvotime me çka natyrisht kanë qenë përfaqësuesit e subjekteve politik, pastaj edhe vëzhguesit e organizatave civile që e kanë legjitimuar procesin, e kjo është inkurajuese që integriteti i procesit, vota e qytetarëve, vullneti i tyre i lirë i shprehur në ditën e zgjedhjeve nuk mund të tjetërsohet, mirëpo natyrisht që këto vonesa në bindjen time janë të pa justifikueshme për faktin se KQZ ka pasur kohë për përgatitje”, ka shtuar Bajraktari./teve1.info/
